Astara rayonunda iki qadın arasında baş verən mübahisə cinayətlə nəticələnib.
Hadisə rayon kəndlərindən birində meşə zolağında qeydə alınıb. 1999-cu il təvəllüdlü Səbinə ilə həmkəndlisi Nərminə arasında yıxılmış qoz ağacından odun götürülməsi üstündə mübahisə yaranıb.
Mübahisə zamanı tərəflər bir-birini odun parçası ilə vurub. Nəticədə Səbinə Nərminəyə müxtəlif dərəcəli bədən xəsarətləri yetirib. Ona qarşı Cinayət Məcəlləsinin 128-ci maddəsi ilə ittiham irəli sürülüb.
Təqsirləndirilən şəxs özünü qismən müdafiə etdiyini bildirsə də, məhkəmə onu təqsirli bilib.
Astara Rayon Məhkəməsinin hökmü ilə Səbinə 1 il müddətinə islah işləri cəzasına məhkum edilib və aylıq qazancının 10 faizi dövlət nəfinə tutulacaq.
Qeyd edək ki, adlar şərtidir.
