Saatlı rayonunda ailə münaqişəsi zəminində baş verən hadisə zamanı 1996-cı il təvəllüdlü Sərxan həyat yoldaşı Nargiləyə xəsarət yetirib. Hadisə ötən ilin 26 dekabrında baş verib. İstintaqa görə, tərəflər arasında yaranan mübahisə zamanı Sərxan arvadının saçından tutaraq baş və bədən nahiyələrinə yumruq zərbələri vurub.
Sərxan məhkəmədə özünü qismən təqsirli bilsə də, ağır zorakılığı inkar edib. O bildirib ki, səhər saatlarında aralarında xırda narazılıq yaranıb — arvadının onu öpmək istəməsi və telefonunu götürməsi səbəbilə əsəbiləşib, amma bunu ciddi münaqişə saymayıb. Gün ərzində əlaqələri gərgin qalıb. Axşam evə qayıdanda isə mübahisə yenidən başlayıb. Onun sözlərinə görə, Nargilə onunla kobud danışıb, o da "sadəcə itələyərək çarpayıya yıxıb və telefonu əlindən alıb".
Zərərçəkmiş Nargilə isə hadisəni daha ağır təsvir edib. O bildirib ki, ailədə problemlər əvvəldən mövcud idi — xüsusilə övladlarının olmaması və ərinin ondan atasından pul və ya maşın istəməsi münasibətləri gərginləşdirib. Hadisə günü özünü pis hiss etdiyi üçün həkimə getməyib. Axşam isə ərinin sərxoş halda gəldiyini, onu və ailəsini təhqir etdiyini deyib. Mübahisə zamanı Sərxanın mətbəxdə üzərinə hücum edərək saçından tutduğunu və başına bir neçə dəfə yumruq vurduğunu qeyd edib.
Hadisədən sonra Nargilə atasına zəng edib, gecə saatlarında atası gələrək onu evdən aparıb. Daha sonra polisə müraciət olunub.
Məhkəmənin hökmü ilə Sərxan Cinayət Məcəlləsinin 128-ci maddəsi ilə təqsirli bilinib və 6 ay müddətinə azadlığın məhdudlaşdırılması cəzasına məhkum edilib.
Qeyd edək ki, adlar şərtidir.
