Sabirabadda 85 yaşlı anası Balabikə Zeynalovanı öldürməkdə təqsirləndirilən Ağamirzə Zeynalovun barəsindəki qərardan kassasiya şikayəti verilib. Şikayətə Ali Məhkəmənin hakimi İlkin Abdullayevin sədrliyi ilə baxılacaq.
İttihama görə, hadisə 2025-ci ilin iyulunda Mürsəlli kəndində baş verib. Alkoqol sərxoşluğu vəziyyətində evə gələn Zeynalovun anası onun gecə saatlarında sərxoş gəlməsinə etiraz edib. Bu, mübahisəyə səbəb olub. Zeynalov həmçinin uzun müddət əvvəl boşandığı həyat yoldaşı ilə münasibətlərinin pozulmasında anasını günahlandırıb.
Mübahisə zamanı o, təxminən 10 saniyə müqavimət göstərə bilməyən anasının boğazından yapışıb, daha sonra başına və bədəninə çoxsaylı yumruq və təpik zərbələri endirib. Qadın ağır kəllə-beyin xəsarətləri alaraq xəstəxanada vəfat edib.
Zeynalov əməlini gizlətmək üçün bir neçə saat gözlədikdən sonra "102" xidmətinə zəng edərək anasının döyüldüyünü bildirib. Məhkəmədə təqsirini qəbul etməyib.
Lənkəran Ağır Cinayətlər Məhkəməsi onu 16 il azadlıqdan məhrum edib. Apellyasiya məhkəməsi isə cəzanı 6 ay azaldaraq 15 il 6 ay müəyyənləşdirib. İndi iş Ali Məhkəmədə kassasiya qaydasında araşdırılacaq.
