Masallıda Azərbaycanın Əməkdar məşqçisi Nadir Ağayevin xatirəsinə həsr olunmuş yunan-Roma güləşi üzrə XXVIII ənənəvi turnirə yekun vurulub.
Cenublu.az xəbər verir ki, SSRİ idman ustası, pəhləvan Nadir Ağayevə həsr olunmuş Masallı Olimpiya Kompleksində yeniyetmələr arasında keçirilən bu turnir Azərbaycan Güləş Federasiyası, Lənkəran-Astara Regional Gənclər və İdman İdarəsi tərəfindən təşkil edilib və iki gün davam edib.
Turnirdə 2008-2010-cu il təvəllüdlü güləşçilər 10 çəki dərəcəsində mübarizə aparıb.
Dünya Güləş Birliyinin təsdiq etdiyi qaydalara uyğun olaraq AGF-nin hakimlər heyəti tərəfindən idarə edilən yarışlarda respublikanın rayon və şəhərlərindən 24 komandanın tərkibində 230 yeniyetmə qüvvəsini sınayıb.
Qalib idmançılar Lənkəran-Astara Regional Gənclər və İdman İdarəsi və sponsor tərəfindən müvafiq dərəcəli diplom, medal və pul mükafatları ilə təltif ediliblər.
