Masallı Uşaq-Gənclər İdman Məktəbinin yetirmələri Zəfər Əliyev və Rəşid Babazadə “Azərbaycan Respublikasının İdman Ustası” dərəcəsinə layiq görülüblər. Bu haqda məlumatı Cenublu.az bu gün, 15 aprel tarixində verir.
Gənclər və İdman naziri Fərid Qayıbov ötən ay ərzində çempionatlarda ölkəmizi təmsil edən Azərbaycan idmançıları və onların məşqçiləri ilə görüşüb. Görüş zamanı “Azərbaycan Respublikasının İdman Ustası” dərəcəsinə layiq görülən Zəfər Əliyevə və Rəşid Babazadəyə müvafiq vəsiqə və döş nişanları təqdim olunub.
Zəfər Əliyev sərbəst güləş üzrə Azərbaycan çempionu və beynəlxalq yarışların qalibi olub. O, 7-8 iyul 2022-ci il tarixlərində Yunanıstanın Katerini şəhərində keçirilən “beach wrestling” (çimərlik güləşi) üzrə gənclərin (U-20) Avropa çempionatında 90+ kq çəki dərəcəsində qızıl medal; 2 sentyabr 2022-ci il tarixdə Rumıniyanın Konstansa şəhərində çimərlik güləşi üzrə U-20 dünya çempionatında 90+ kq çəki dərəcəsində gümüş medal; 28 iyun - 2 iyul 2023-cü il tarixlərində İspaniyanın Santyaqo de Kompostela şəhərində güləş üzrə U-20 Avropa çempionatında sərbəst güləş üzrə 97 kq çəki dərəcəsində bürünc medal qazanıb.
Babazadə Rəşid Cavid oğlu sərbəst güləş üzrə Azərbaycan çempionu və beynəlxalq yarışların qalibi olub. O, 17-19 mart 2023-cü il tarixlərində Rumıniyada keçirilən sərbəst güləş üzrə Avropa çempionatında gümüş medala layiq görülüb.
Hər iki idmançımızının məşqçi-müəllimi Təhmasib İsayevdir.
