Astara Olimpiya İdman Kompleksində sərbəst güləş üzrə rayon turniri baş tutub. Bu haqda məlumatı Cenublu.az bu gün, 8 aprel tarixində verir.
Ümumdünya sağlamlıq gününə həsr olunmuş turnirdə 16-17, 13-15 və 10-13 yaşlı idmançılar güclərini sınayıblar. Belə ki, 8 komanda – Sumqayıt, Astara, Lənkəran, Masallı, Salyan, Biləsuvar, Cəlilabad, Abşeron rayonlarının idman klubları, idman cəmiyyətlərini təmsil edən 170 nəfər idmançı (150 oğlan və 20 qız) mübarizə aparıblar.
Yarışın açılış mərasimində Lənkəran–Astara Regional Gənclər və İdman İdarəsinin Astara rayonu üzrə gənclər və idman sektorunun müdiri, Azərbaycan Respublikasının Əməkdar məşqçisi, Azərbaycan Güləş Federasiyasının Cənub Regionu üzrə nümayəndəliyinin rəhbəri, yarışların baş katibi İlham Məmmədov, Azərbaycan Respublikasının Əməkdar məşqçisi, beynəlxalq dərəcəli hakim Fərəqət Cəlalov çıxış edib, “Zəfər” İdman klubunun məşqçisi, idman ustası Mahir Əliyev, Astara rayonu üzrə gənclər və idman sektorunun əməkdaşları, məşqçilər iştirak ediblər.
Sonda müxtəlif çəki dərəcələrində I, II və III yerləri tutan idmançılar Lənkəran–Astara Regional Gənclər və İdman İdarəsi, “Zəfər” İdman Klubunu təsis etdiyi diplomlar və medallarla təltif olunublar. Hər çəkidə I yeri qazanmış idmançılara “Zəfər” İdman Klubu tərəfindən güləş idman dəsti hədiyyə olunub.
