Mehman Məmmədrəhim oğlu Ağayev 31 avqust 1946-cı ildə Masallı rayonunun Mahmudavar kəndində anadan olub.
O, 1962-ci ildə Mahmudavar kənd orta məktəbini, 1968-ci ildə isə Azərbaycan Dövlət Tibb İnstitutunu bitirib. Ağayev 1970-ci ilə kimi Sankt-Peterburqda olan Elmi-tədqiqat Neyrocərrahiyyə İnstitutunda təhsil alıb [2].
Mehman Ağayev 1971-ci ildə həkim Mirməmməd Cavadzadənin rəhbərliyi altında Respublika Klinik Uroloji Xəstəxanasında işləməyə başlayıb. O, 1971-ci ildə Yaxın Şərqdə ilk dəfə aparılan böyrəkköçürmə əməliyyatında iştirak edib [1,2].
Həkim 1976-cı ildə Respublika Klinik Uroloji Xəstəxanasında Hemodializ və böyrəkköçürmə şöbəsinin müdiri, həmçinin baş elmi işçi vəzifəsində çalışıb. O, 1983-cü ildən həmin müəssisədə müdir işləyib. Mehman Ağayev 1986-cı ildə Əziz Əliyev adına Azərbaycan Dövlət Həkimləri Təkmilləşdirmə İnstitutunda nefrologiya kafedrasının professoru vəzifəsinə şeçilib və professor adını alıb. O, 1990-cı ildən Azərbaycan Tibb Universitetində işləyib. Həkim 1993-cü ildə Bakı şəhəri 2 saylı kliniki xəstəxanasında ixtisaslaşdırılmış Nefroloji və 2006-cı ildə Hemodializ şöbələrini açıb və onlara rəhbərlik edib. Mehman Ağayev 1995-ci ildə Şəfa ocağı müəssisəsini yaradıb.
Ağayevə 2010-cu ildə “Əməkdar həkim” fəxri adı verilib. O, 2011-ci ildən Azərbaycan Respublikası Səhiyyə Nazirliyinin Baş Nefroloqu seçilib [1].
Mehman Ağayev 175 elmi əsərin, o cümlədən 4 monoqrafiyanın, 2 elmi filmin, 1 ixtiranın müəllifidir. O, Ümumdünya Nefroloqlar Cəmiyyətinin, Avropa Uroloqlar Assosiasiyasının, Türkiyə Nefroloji Cəmiyyətinin üzvü olub. Bundan əlavə, həkim bir çox beynəlxalq konqreslərdə iştirak edib [2].
Mehman Ağayev 15 aprel 2021-ci ildə vəfat edib [3].
Ədəbiyyat:
