Azərbaycan son illərdə regional və beynəlxalq turizm xəritəsində mövqeyini getdikcə gücləndirən ölkələrdən biri kimi çıxış edir.
Baku.ws-in məlumatına görə, ölkənin həm Şərqlə Qərbi birləşdirən coğrafi mövqeyi, həm də tarixi-mədəni irsi və təbii müxtəlifliyi xarici qonaqlar üçün maraqlı səyahət imkanları yaradır.
Maraqlıdır, Azərbaycana gələn qonaqlar səfər zamanı əsasən hansı şəhər və bölgələri seçirlər?
Dövlət Turizm Agentliyindən (DTA) bildirilib ki, daxili turizm üzrə turistik səfərlər ənənəvi 4 turizm dəhlizi üzrə həyata keçirilir:
"Bakı-Şimal, Bakı-Şimal-Qərb, Bakı-Qərb, Bakı-Cənub turizm dəhlizləri üzrə əsas turizm resurslarının cəmləşdiyi bölgələr ən çox səfər olunan istiqamətlərdir. Bu baxımdan Quba, Qusar, Şəki, Qəbələ, İsmayıllı, Lənkəran, Lerik, Astara, Gəncə, Göygöl ərazilərini qeyd edə bilərik.
Bununla belə, ölkə üzrə ən çox səfər edilən şəhərlər içərisində Bakı birinci yerdə dayanır. Xüsusilə, bayram və istirahət günlərində bu bölgələr üzrə turistik səfərlərin intensivləşdiyi müşahidə olunur.
Bu dəhlizlərdən əlavə, Naxçıvan ayrıca turizm destinasiyası kimi diqqət çəkir. Həmçinin işğaldan azad olunan ərazilər ölkədaxili turizm destinasiyası kimi formalaşmaqdadır".
