Yardımlıda biçin prosesi ilə bağlı ciddi problem yaranıb. Belə ki, rayonun bir neçə kəndində fermerlər kombayn çatışmazlığından şikayətlənirlər.
Fermerlərin sözlərinə görə, bu il hava şəraiti əlverişli keçib və məhsuldarlıq yüksək olub. Lakin texnika çatışmazlığı səbəbindən yetişmiş buğda sahələrdə qalır və günbəgün tökülərək yararsız hala düşür. Onlar bildirirlər ki, əsas problem vaxtında kifayət qədər kombaynın cəlb edilməməsidir: "Bu il məhsul yaxşıdır. Amma biçməyə kombayn yoxdur. Hər gün tarlaya baxırıq, buğda öz-özünə tökülür. Bu mənzərə rayon idarəçiliyinin acı göstəricisidir".
Fermerlər iddia edirlər ki, biçin mövsümünün vaxtı əvvəldən bəlli olmasına baxmayaraq, Rayon İcra Hakimiyyəti başçısı Ayaz Əsgərov tərəfindən hazırlıq işləri görülməyib:
"Günlərdir müraciət edirik. Amma ortada nəticə yoxdur. Əgər vaxtında əlavə kombaynlar gətirilsəydi, yüzlərlə ton məhsul xilas olunardı. İndi isə kəndlinin bir illik zəhməti hədər gedir.
Ayaz Əsgərovun diqqətinə çatdırmaq istərdik ki, kənd təsərrüfatı hesabatlarda deyil, məhz tarlalarda qiymətləndirilir. Bu gün sahələrdə biçilməmiş qalan buğda sünbülləri idarəetmənin səmərəliliyinə verilən ən sərt qiymətdir. Fermerin əziyyətinin hədər getməsi heç bir statistik göstərici ilə ört-basdır edilə bilməz".
Fermerlər qeyd edirlər ki, yüzlərlə ailə ilin qazancını bu məhsula bağlayıb.
"Belə davam edərsə, kənddən köçün qarşısını almaq barədə deyilənlər sadəcə şüar olaraq qalacaq. Rayon rəhbərliyi vəziyyətə dərhal müdaxilə etməli, əlavə kombaynların cəlb olunmasını təmin etməli, biçin prosesini operativ təşkil etməlidir.
Ayaz müəllim, Yardımlı kəndlisi sizdən bəyanatlar deyil, konkret tədbirlər gözləyir. Bu gün tarlada itirilən hər sünbül, əslində, idarəçilikdə buraxılan bir boşluğun nəticəsidir. Vaxt hələ tam itirilməyib, amma hər keçən gün yüzlərlə kiloqram məhsulun yox olması deməkdir".
Mənbə: Bakupost.az
