Yardımlı şəhəri, H.Əliyev küçəsi, ev 153 ünvanında yerləşən, fiziki şəxs Güloğlan Qənbərova məxsus çörək istehsalı müəssisəsində normativ tələblərin pozulduğu aşkarlanıb.
Cenublu.az Azərbaycan Qida Təhlükəsizliyi Agentliyinə istinadən xəbər verir ki, istehsal müəssisəsinin qida təhlükəsizliyi qeydiyyatından keçmədən fəaliyyət göstərdiyi məlum olub. Eyni zamanda məhsulların qablaşdırılmadan və etiketlənmədən satışa çıxarıldığı, sanitar-gigiyenik tələblərə əməl olunmadığı, qida məhsulları ilə təmasda olan səthlərin yuyula bilən və korroziyaya davamlı materialla üzlənmədiyi, müvafiq təmizlik işlərinin görülmədiyi və digər nöqsanlar müəyyən edilib.
Faktla bağlı qanunvericiliyin tələblərinə uyğun müvafiq tədbirlər görülərək sahibkar barəsində inzibati protokol tərtib edilib. Müəssisənin fəaliyyəti nöqsanlar aradan qaldırılanadək müvəqqəti məhdudlaşdırılıb.
