“Xəzər Lənkəran”ın və Türkiyə milli komandasının sabiq futbolçusu Oktay Derelioğlu və həyat yoldaşı Başak Derelioğlu hücuma məruz qalıblar. Bu haqda məlumatı Cenublu.az bu gün, 6 dekabr tarixində Oxu.az-a istinadən verir.
O, həyat yoldaşı ilə birgə İstanbulun Kadıköy səmtində avtomobillə hərəkət edərkən bir qrup xuliqan tərəfindən ağır şəkildə döyülüb.
Oktay Derelioğlunun idarə etdiyi avtomobili yolun daralması səbəbindən başqa bir avtomobil sıxışdırmağa başlayıb. Maşının içindən çıxan iki nəfər futbolçunun maşınının qarşısını kəsib və qəfil hücuma keçiblər.
Oktay Derelioğlu aldığı yumruq zərbələrindən yerə yıxılıb, onu xilas etməyə çalışan Başak Derelioğlu yoldan keçən vətəndaşlardan kömək istəyib.
Ətrafdakıların müdaxiləsindən sonra hücum edənlər polis qüvvələri tərəfindən saxlanılıblar.
Hadisə yerinə gələn təcili yardım qrupları məşhur futbolçunu xəstəxanaya çatdırıb. İlk müdaxilə zamanı futbolçunun qolunun yerindən çıxdığı, müxtəlif nahiyələrindən xəsarət aldığı müəyyən edilib və o, əməliyyat olunub.
Başak Derelioğlu isə polis bölməsində ifadə verib.
Oktay Derelioğlu hücum edənlərin cəzalandırılmasını tələb edib.
Qeyd edək ki, Oktay Derelioğlu 2004-2005 mövsümündə Azərbaycanın “Xəzər Lənkəran” klubunun formasını geyinib. Futbolçu həmin mövsümdə klubun bombardiri olub və komandası ilə birlikdə ölkə çempionatının gümüş mükafatçısı olub.
