Lənkəranda keçmiş arvadını döyüb 3 qabırğasını sındıran kişi məhkəmədə bağışlandı.
Hadisə rayonun Boladi kəndində baş verib. Sahibkar-fermer Anar Məhərrəmov 1994-cü ildə ailə həyatı qurub, bu nikahdan 5 övladı dünyaya gəlib. Həyat yoldaşı ilə rəsmi boşansalar da, bir müddət sonra eyni evdə yaşamağa davam ediblər.
Hadisə günü Anar fermadan evə gəlib və keçmiş həyat yoldaşının əlində smartfon görüb. Telefonun övladlarına məxsus olduğu məlum olduqdan sonra aralarında mübahisə yaranıb. Kişi qadının saçından tutaraq başını divara çırpıb, yerə yıxaraq ağır təpik zərbələri endirib.
Xəstəxanaya yerləşdirilən qadının 3 qabırğasının sındığı, baş və bədəninin müxtəlif nahiyələrindən xəsarət aldığı müəyyən edilib.
Anar polis tərəfindən saxlanılıb, faktla bağlı cinayət işi başlanıb. Lakin məhkəmə zamanı tərəflər barışıb və qadın keçmiş ərini bağışlayıb. Buna görə cinayət işinə xitam verilib.
Mənbə: oxu.аz
