Bu gün Vətən müharibəsi şəhidimiz - Rəşad Mikayılzadənin ad günüdür.
Rəşad İlham oğlu Mikayılzadə 1995-ci il sentyabrın 30-da Lerik rayonunun Camaşəir kəndində dünyaya göz açıb. Orta təhsilini Bakı şəhəri 311nömrəli tam orta məktəbdə aldıqdan sonra Rəşad Sumqayıt Dövlət Universitetində ali təhsil alıb. Ali təhsilini bitirdikdən sonra Qazaxda həqiqi hərbi xidmətdə olub.
2020-ci ildə Vətən müharibəsində könüllü əsgər kimi iştirak edib. Füzulinin və Xocavəndin azad olunması uğrunda gedən döyüşlərdə vuruşub. Rəşad Mikayılzadə 2020-ci il noyabrın 9-da Şuşanın azad olunması uğrunda gedən döyüşlərdə komandirini xilas edərkən snayper atəşi nəticəsində şəhid olub.
Ölümündən sonra "Vətən uğrunda", "Döyüşdə fərqlənməyə görə", "Xocavəndin azad olunmasına görə", "Füzulinin azad olunmasına görə" medalları ilə təltif edilib.
Qeyd edək ki, şəhidimiz ailənin yeganə övladı idi. Rəşadın şəhidliyə ucalmasından 4 il sonra isə bacısı dünyaya gəlib. Bacısı Aylanın soyadı onun xatirəsinə dəyişdirilərək Rəşadlı edilib.
