Bu gün Qazaxıstanın Aktau şəhərində qəzada sağ qalanlardan biri Lənkəran rayonu Lüvəsər kənd sakini, 20 yaşlı Ayhan Bayramzadədir.
Cenublu.az onun atası, Zəfər Bayramzadə ilə əlaqə saxlayıb:
"Oğlum bu gün 04:00-da Hava limanına gedib. Dağıstana gedib özünə iş quracaqdı. Qardaşıma zəng elədim, mənə orada aeroportda oğlumu gözlədiyini dedi. Səhər saat 9 oldu, xəbər çıxmadı, 10 oldu, xəbər gəlmədi. Kəndə qayıdanda Qazaxıstanda təyyarənin qəzaya düşdüyünü bildim. Fikirləşdim ki, Dağıstan hara, Qazaxıstan hara? Sonra qardaşıma zəng etdim, mənə həmin təyyarınin qəzaya uğradığını dedi. Dərhal evə gəldim və televizoru açdım. Yoldaşım gəldi və soruşdu ki, nə olub, dedim ki, Ayhanın olduğu təyyarə qəzaya uğrayıb.
Ondan sonra Rusiyada yaşayan qohum-əqraba mənə telefonda yazdılar ki, uşaq sağdır, ayaq üstədir. Düzdür, ilk olaraq sevindim, amma ölənlərə kədərləndim.
Bu gün hadisədən sonra günorta 13:00-14:00 radələrində Ayhanla danışmışam. Mənə bir xanım zəng vurdu və qəzaya uğrayan təyyarənin sərnişinləri arasında Azərbaycan diasporunun üzvü və səfirliyimizin işçilərinin də olduğunu bildirdi. Mənə dedilər ki, övladınız yanımızdadır, narahat olmayın. Mən Ayhanın sənədlərinin necə olacağını və ölkəyə necə qayıdacağını soruşdum. Onlar hər şeyin dövlət nəzarətində və hər şeyin qaydasında olduğunu bildirdilər".
