Sovet İttifaqı Qəhrəmanı adını almış ən gənc azərbaycanlı Mirzə Ağamurad oğlu Cəbiyev 1925-ci il fevralın 22-də Astara rayonunun Hamoşam kəndində anadan olub.
1943-cü ildə orduda xidmətə könüllü yola düşüb. 1944-cü ildə kiçik leytenant rütbəsi alaraq 43-cü Ordu tərkibində cəbhəyə (III Belarus cəbhəsi) göndərilib. Belorusiya, Litva, Polşa uğrunda döyüşlərdə iştirak edib, Almaniyada döyüşüb.
Baş leytenant Mirzə Cəbiyev 1945-ci ilin 6 aprelində Köniqsberq şəhəri ətrafındakı döyüşlərdə komandir olduğu bölmənin önündə kanalı keçərək 5 Fortu ələ keçirib və qələbə bayrağını sancıb. Bu döyüşdə o, şəxsən 13 nəfər əsir götürüb, döyüşdə yaralansa da, öz vəzifəsini qələbəyə qədər icra edib.
19 aprel 1945-ci il tarixində Sovet İttifaqı Qəhrəmanı adına layiq görülüb.
Mirzə Cəbiyev 10 fevral 1978-ci ildə Bakı şəhərində xəstəxanada müalicə alarkən vəfat edib, qış ayı olduğu üçün nəşini rayon mərkəzindən 40 kilometr aralıda yerləşən Hamoşam kəndinə aparmaq mümkün olmayıb və Astara şəhərində dəfn edilib. İllər sonra Taxtanakəran-Toradi yolu asfaltlanarkən, doğmalarının xahişi ilə qəhrəmanın nəşi Hamoşam kəndinə gətirilərək torpağa tapşırılıb.
