Salyan rayonunun Arbatan kənd inzibati ərazisinə daxil olan PMK yaşayış massivində yaranan antisanitar vəziyyət sakinlərin narazılığına səbəb olub.
Cenublu.az xəbər verir ki, ərazidə yol kənarları məişət tullantıları ilə dolub və faktiki olaraq zibil poliqonunu xatırladır. Uzun müddətdir davam edən problem nəticəsində ətraf mühit çirklənib, xoşagəlməz görüntü və qoxu yaranıb.
Sakinlərin sözlərinə görə, problemin səbəbi kimi ərazidə zibil konteynerlərinin olmaması və ya vətəndaşların məsuliyyətsiz davranışı göstərilir. Hər iki halda isə vəziyyət dəyişmir və ortaya çıxan mənzərə ciddi narahatlıq doğurur.
Qeyd olunur ki, bu cür şərait həm ekoloji tarazlığa, həm də insanların sağlamlığına təhlükə yaradır. Şikayətçilər aidiyyəti qurumlardan ərazidə təmizlik işlərinin aparılmasını və problemin köklü şəkildə həll olunmasını tələb edirlər.
