Salyan şəhərinin PEMKA-9 massivində yerləşən 8 saylı uşaq bağçası və 5 saylı məktəbə gedən yolda yaranan vəziyyət sakinləri narahat edir.
Cenublu.az-a daxil olan çoxsaylı müraciətlərdə bildirilir ki, ərazidə sahibsiz itlərin sayı son vaxtlar xeyli artıb.
Sakinlərin sözlərinə görə, ətrafa məişət tullantılarının atılması itlərin həmin əraziyə daha çox toplaşmasına səbəb olur. Bildirilir ki, sahibsiz heyvanlar yoldan keçən uşaqlara və digər sakinlərə hücum edərək təhlükə yaradır.
Valideynlər xüsusilə məktəb və bağçaya gedən uşaqların təhlükəsizliyindən narahat olduqlarını bildirirlər. Onlar aidiyyəti qurumlardan ərazidə tədbir görülməsini, tullantıların təmizlənməsini və sahibsiz itlərlə bağlı problemin həll olunmasını xahiş edirlər.
