Salyan şəhərində fərdi yaşayış evində qanunsuz fəaliyyət göstərən quş kəsimi məntəqəsi aşkar edilib.
Cenublu.az xəbər verir ki, Qida Təhlükəsizliyi Agentliyinin əməkdaşları tərəfindən fiziki şəxs Babayev Natiq Səmədağa oğluna məxsus fərdi yaşayış sahəsində aparılan yoxlama zamanı kəsimxananın qida təhlükəsizliyi qeydiyyatından keçmədən fəaliyyət göstərdiyi müəyyən olunub.
Yoxlama zamanı quşların qəbulu, saxlanılması və emalı proseslərinin sanitar-gigiyenik tələblərə uyğun təşkil edilmədiyi məlum olub. Həmçinin quşların keyləşdirilməsi, qansızlaşdırılması, təmizlənməsi, içalatının çıxarılması, ətin qablaşdırılması və soyudulması üçün zəruri istehsal sahələrinin yaradılmadığı müəyyən edilib.
Bundan başqa, kəsimə gətirilən quşların mənşəyini təsdiq edən sənədlərin olmadığı, satışa çıxarılan toyuq əti məhsullarının baytarlıq-sanitariya ekspertizasından keçirilmədiyi, havalandırma və temperatura nəzarət sistemlərinin quraşdırılmadığı, istehsal tullantılarının düzgün idarə olunmadığı və işçilərin xüsusi geyimlə təmin edilmədiyi aşkarlanıb.
Aşkar olunmuş nöqsanlarla bağlı sahibkar barəsində inzibati protokol tərtib edilib, məhsullardan nümunələr götürülərək laborator müayinələrə göndərilib.
Faktla bağlı məntəqənin fəaliyyətinin dayandırılması barədə məhdudlaşdırıcı qərar qəbul olunub və nöqsanların aradan qaldırılması üçün icrası məcburi göstərişlər verilib.
