Millət vəkili Qənirə Paşayeva dünyasını dəyişib. Bu haqda məlumatı Cenublu.az bu gün, 29 sentyabr tarixində verir.
Qənirə Paşayeva hələ 2013-cü ildə orqanlarını bağışlamaq barədə qərar vermişdi. Məsələ ilə bağlı tanınmış ürək-damar cərrahı, Astara seçki dairəsindən seçilən deputat Rəşad Mahmudov açıqlama verib.
O bildirib ki, Qənirə xanımın orqanlarının istifadəsi tibbi nöqteyi-nəzərdən qeyri-mümkündür:
“Çünki orqanların istifadəsi üçün sadəcə beyinin zədələnməsi və digər orqanların sağlam olması lazımdır. Bizdəki proses isə tam tərsinə idi: bütün orqanların zədələnməsi baş vermişdi və zaman içərisində multiorqan çatışmazlığı nəticəsində həyatını itirib. Bu məqamda öz razılığı olsa belə, orqanlarından istifadə tibbi nöqteyi-nəzərdən qeyri-mümkündür”, – deyə R.Mahmudov bildirib.
Qeyd edək ki, Qənirə Ələsgər qızı Paşayeva 24 mart 1975-ci ildə Tovuz rayonunda anadan olub. Azərbaycan Dövlət Tibb Universitetinin Pediatriya fakültəsini və Bakı Dövlət Universitetinin Beynəlxalq hüquq fakültəsini bitirib.
O, 1998-ci ildən ANS televiziya şirkətinin Xəbərlər xidmətində reportyor, müxbir, redaktor, aparıcı redaktor, baş aparıcı redaktor, baş redaktorun müavini, Xəbərlər redaksiyası baş redaktorunun müavini vəzifələrində çalışıb. 2005-ci ildə isə Heydər Əliyev Fondunun İctimaiyyətlə əlaqələr departamentinin rəhbəri olub.
Qənirə Paşayeva Milli Məclisin 3, 4, 5 və 6-cı çağırış üzrə deputatı olub.
O, "Nobel mükafatlı qadınlar", "Tarixə adını yazan qadınlar", "Xocalı soyqırımı şahidlərinin dilindən", "Türk ruhunun söz bayrağı Əhməd Cavad" və "Səndən sonra" kitablarının müəllifidir.
24 sentyabr 2023-cü ildə komaya düşərək Mərkəzi Klinikaya yerləşdirilib. Paşayeva 28 sentyabr 2023-cü ildə dünyasını dəyişib.
