Neftçala rayonunun Qazaxbərəsi kəndində bayram hazırlıqları faciə ilə nəticələnib. Bayram süfrəsi üçün alış-veriş etmək istəyən iki qardaş - Rəvan və Əli Manaflılar avtomobil qəzası nəticəsində həyatlarını itiriblər.
Mağazadan geri qayıdarkən qardaşlardan birinin sükanı arxasında olduğu avtomobil idarəetməni itirərək evlərinə cəmi 200 metr qalmış yol kənarındakı kanala aşıb. Zərbənin təsirindən qaz borusu qırılıb və avtomobil suya düşüb. Hər iki qardaş hadisə yerində həlak olub. Onların cansız bədənləri sudan çıxarılaraq ailələrinə təhvil verilib.
Qonşuların sözlərinə görə, həmin ərazi illərdir təhlükə mənbəyi olub. Bu dəfə də sözügedən yerdə iki gəncin ömrü yarımçıq qalıb. Onların valideynləri Bakı şəhərində yaşayır, ailə bayram münasibətilə kəndə toplaşıb. Qardaşlardan biri son bir ildə babasının yanında qalırdı.
Qeyd edək ki, ailədə cəmi iki övlad olub. Həlak olan gənclər kənd qəbiristanlığında yanaşı məzarlarda torpağa tapşırılıb. Hadisə ilə bağlı araşdırmalar davam edir.
