Masallı rayonunda şəhid Şahlar Hüseynovun anadan olmasının 55-ci ildönümü münasibətilə “Vətən uğrunda şəhid olanlar unudulmayacaq” adlı görüş təşkil olunub. Bu haqda məlumatı Cenublu.az bu gün, 27 noyabr tarixində verir.
Tədbir rayon Mərkəzi Kitabxanasında baş tutub. Burada kitabxananın əməkdaşları Günay Xəlilova və Gülər Piriyeva çıxış ediblər. Onlar Ş.Hüseynovun döyüş yolu haqqında məlumat veriblər.
Qeyd edək ki, Şahlar Hüseynov 26 noyabr 1968-ci ildə Qərbi Azərbaycanın Dərəçiçək mahalının Razdan rayonunun Hankavan kəndində anadan olub.
1992-ci ilin 25-26 fevral tarixlərində ermənilərin Xocalıda törətdikləri hadisədən sonra könüllü olaraq Gəncə batalyonuna daxil olub. Erməni dilini mükəmməl bildiyi üçün həmişə təkbaşına kəşfiyyata gedirdi və vacib məlumatlarla geri qayıdırdı. 10 aprel 1992-ci il tarixində Şıxarx (keçmiş Marquşevan) kəndinə hücum edən erməni qəsbkarları ilə döyüşdə qəhrəmancasına həlak olub.
Şahlar Hüseynov ölümündən sonra "Azərbaycanın Milli Qəhrəmanı" adına layiq görülüb.
