Masallıda “Sağlam bədəndə sağlam ruh” devizi altında yüksək nəticə göstərmiş idmançı və məşqçi-müəllimlərin məktəb şagirdləri ilə görüşü keçirilib. Bu haqda məlumatı Cenublu.az bu gün, 24 yanvar tarixində verir.
Z.Nəcəfov adına Masallı rayon Ərkivan qəsəbə 2 saylı tam orta məktəbində keçirilən tədbirdə Lənkəran-Astara Regional Gənclər və İdman İdarəsinin Masallı rayonu üzrə gənclər və idman sektorunun əməkdaşları, taekvondo idman növü üzrə məşqçi-müəllim Sadiq Ağayev, Azərbaycan çempionatlarında və beynəlxalq turnirlərdə nəticə əldə etmiş idmançılar, məktəbin direktoru və 80 şagird iştirak ediblər.
Çıxış edənlər ölkədə idmana göstərilən dövlət qayğısından, respublikamızda idmanın kütləviliyinin günü-gündən artmasından, ölkəmizi beynəlxalq miqyasda təmsil edən idmançılardan danışıb, sağlam həyat tərzindən, idmançıların əldə etdiyi uğurlar, rayonda olan idman qurğuları, idman növləri, nəzərdə tutulmuş idman yarışları barəsində tədbir iştirakçılarına geniş məlumatlar veriblər.
Sonda şagirdlər taekvondo idman növü ilə məşğul olmaq üçün müraciət ediblər və onların arasından bir neçə şagird seçilib.
Qeyd edək ki, tədbir Lənkəran-Astara Regional Gənclər və İdman İdarəsinin Masallı rayon gənclər və idman idarəsinin təşkilatçılığı, Lənkəran-Astara Regional Təhsil İdarəsinin Masallı rayon təhsil sektorunun dəstəyi ilə baş tutub.
