Masallı rayonunda 1981-ci il təvəllüdlü Amil ailə münaqişəsi zəminində yaranan mübahisə zamanı həyat yoldaşı Nüşabəyə (adlar şərti göstərilib – red.) xəsarət yetirib.
Demokrat.az xəbər verir ki, hadisə 16 sentyabr 2024-cü ildə, saat 18 radələrində Masallı rayonunun kəndində baş verib.
Amil kənd ərazisində yerləşən fərdi yaşayış evində arvadı Nüşabənin ona yemək hazırlamaması ilə əlaqədar aralarında ailə məişət zəminində baş vermiş mübahisə zamanı onun sifət nahiyəsinə qəsdən yumruq ilə bir zərbə vurub, ona müxtəlif dərəcəli bədən xəsarətləri yetirib.
Hadisəni törədən Amilin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən Amil ona elan olunmuş ittiham üzrə özünü təqsirli bilib. O, ifadəsində göstərib ki, zərərçəkmiş Nüşabə onun həyat yoldaşıdır, 1 övladları var: “Hadisə günü işdən evə gəldim. Həmin vaxt arvadım yemək hazırlayıb masanın üzərinə qoyduğu zaman ona pomidor salatı hazırlamasını dedim. Bu zaman Nüşabə mənə kobud formada evdə pomidor olmadığını dediyi üçün onunla aramızda mübahisə yarandı. Mübahisə zamanı Nüşabənin sifət nahiyəsinə bir dəfə istəməyərəkdən yumruq zərbəsi vurdum. Nüşabə əyildiyi üçün yumruq onun sifətinə dəydi. Həmin vaxt Nüşabənin ağız nahiyəsindən qan gəldiyini gördüm və evdən getdim”.
Bu cinayət işinə Masallı Rayon Məhkəməsində baxılıb. Məhkəmənin hökmü ilə Amil 360 saat ictimai işləri cəzasına məhkum edilib. Təqsirləndirilən şəxsin üzərinə ictimai işlərin yerinə yetirildiyi yerlərdə elektron nəzarət vasitəsini gəzdirmək və həmin vasitənin işlək vəziyyətdə saxlanılması üçün ona xidmət etmək vəzifəsi qoyulub.
