Bu gün Vətən müharibəsi şəhidi Mikayıl Vüqar oğlu Həmidlinin anadan olduğu gündür.
O, 1998-ci ildə dekabrın 28-də Masallı rayonu Ərkivan kəndində anadan olub. 2017-ci ildə həqiqi hərbi xidmətə yollanan Həmidli Mikayıl 2018-ci ilin avqust ayından müddətdən artıq xidmət edən hərbi qulluqçu kimi Vətənə xidmət etməyə başlayıb. 2020-ci ildə gizir, 3 fevral 2023-cü ildə isə kiçik leytenant hərbi rütbələrinə layiq görülüb.
Şəhid Mikayıl İkinci Qarabağ müharibəsində iştirak edib, Suqovuşan, Talışkənd, Ağdərə, Füzuli istiqamətində gedən döyüşlərdə cəsarətlə vuruşub.
Həmidli Mikayıl "Suqovuşanın azad olunmasına görə" medalı ilə təltif edilib.
Mikayıl Azərbaycan Respublikasının Silahlı Qüvvələri tərəfindən 19 sentyabr 2023-cü il tarixində həyata keçirilmiş uğurlu lokal antiterror tədbirləri zamanı Ağdərənin Papravənd kəndi istiqamətində gedən döyüşlərdə şəhid olub.
O, ölümündən sonra “Vətən uğrunda” medalı və 3-cü dərəcəli “Vətənə xidmətə görə” ordeni ilə təltif edilib.
Ailəli idi, şəhidlik zirvəsinə ucaldıqdan sonra oğlu dünyaya gəlib.
