Bu gün Lerikdən olan İman və Bəhrəm Məmmədzadə qardaşlarının anım günüdür.
22 yaşlı İman və 20 yaşlı Bəhrəm İkinci Qarabağ müharibəsinin ilk günlərində cəbhəyə birlikdə yollandılar, çiyin-çiyinə döyüşdülər və eyni gündə, eyni saatda şəhid oldular.
Cenublu.az xəbər verir ki, İman Məmmədzadə 14 sentyabr 1998-ci ildə, Bəhrəm Məmmədzadə isə 18 aprel 2000-ci ildə Lerik rayonunun Kəlvəz kəndində anadan olublar. Ataları Elman Məmmədovun sözlərinə görə, İman və Bəhrəm uşaqlıqdan təkcə qardaş kimi deyil, həm də dost kimi böyüyüblər. Məktəbə, idmana bir yerdə gediblər.
Xocəvənddə, Qırmızı Bazar istiqamətində İman və Bəhrəmin də olduğu14 nəfərlik heyət düşmənin pusqusuna düşür. Bu heyətdən 11 nəfər şəhidlik zirvəsinə ucalır. İlk öncə vurulan İman olub. Bəhrəm tez "jqutu" çıxarıb İmanın ayağını bağlayıb. Sonra İman o biri ayağından yaralanıb. Bəhrəm görüb ki, İman artıq can verir, tez özünü qardaşının qabağına atıb. Snayper gülləsi kürəyindən girib ürəyindən çıxıb. Beləliklə, qardaşlar da şəhid olublar.
Qeyd edək ki, İman və Bəhrəm Məmmədov qardaşları "Vətən uğrunda", "Xocavəndin azad olunmasına görə", "Cəbrayılın azad olunmasına görə", "Füzulinin azad olunmasına görə" medalları və 3-cü dərəcəli "Vətənə xidmətə görə" ordeni ilə təltif ediliblər.
