Uzun illər təhsil sahəsində fəaliyyət göstərən Yaxşıxanım Müzəffər qızı Hüseynova vəfat edib.
Cenublu.az xəbər verir ki, Yaxşıxanım Hüseynova 1943-cü ildə Lənkəran şəhərində anadan olub. Əmək fəaliyyətinə təyinatla Neftçala rayonunun Əli Səmədov adına Qırmızıkənd kənd tam orta məktəbində başlayıb. Daha sonra, 1967-ci ildən etibarən Bankə qəsəbəsində yerləşən Səməd Vurğun adına 2 nömrəli tam orta ümumtəhsil məktəbində fəaliyyətini davam etdirib.
Uzun illər ibtidai sinif müəllimi kimi çalışan Yaxşıxanım müəllimə savadı, yüksək pedaqoji bacarığı, qayğıkeşliyi və insanpərvərliyi ilə həm şagirdlərinin, həm də qəsəbə sakinlərinin hörmətini qazanıb. Yetişdirdiyi çoxsaylı şagirdlər bu gün də onu minnətdarlıqla xatırlayır.
2009-cu ildə yaş həddi ilə əlaqədar əmək fəaliyyətini başa vuran Yaxşıxanım müəllimənin əziz xatirəsinin onu tanıyanların qəlbində daim yaşayacağı bildirilir.
