Lənkəran sakinləri “Aztelekom”dan şikayət edirlər.
Bir neçə gün öncə Cenublu.az-a ünvanlanan internetlə bağlı şikayətin ardınca redaksiyamıza növbəti dəfə “Aztelekom”dan narazılıqla dolu müraciət daxil olub.
Lənkəran şəhər, Fizuli küçəsi, 170 ünvanda yaşayan Leyla Əzizovanın sözlərinə görə, hələ fevral ayından yaşadığı küçəyə internet dirəkləri basdırılsa da, internet kabelləri hələ də çəkilməyib. Nəticədə sakinlər aylardır, internet şəbəkəsindən istifadə edə bilmirlər.
L.Əzizova bildirir ki, Rəqəmsal İnkişaf və Nəqliyyat Nazirliyi “Aztelekom” MMC-nin Cənub Regional Filialının Lənkəran şöbəsində məsul şəxsin qəbuluna getsə də, nəticə əldə edə bilməyib: “Müdir Namiq bəyin yanına neçə dəfə getmişəm, məni ancaq yola verib, aldadıb. Deyib, bu gün-sabah, gələn həftə çəkərik”.
Şikayətçi deyir ki, “Aztelekom”un 170 Çağrı Mərkəzinə dəfələrlə zəng vurmaq da məsələnin həllinə kömək olmayıb və onu yenə də Lənkərana yönləndiriblər: “Bu minvalla 9 ay keçib. Müvafiq qurumlardan bu məsələnin həllinə yardım göstərmələrini xahiş edirəm”.
