Hadisə İmişli rayonunun Bəhrəmtəpə qəsəbəsində qeydə alınıb. İki minik avtomobilinin toqquşması nəticəsində 4 nəfər xəsarət alıb.
Report.az xəbər verir ki, xəsarət alanlar İmişli Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.
Yaralılara bədənin müxtəlif nahiyələrinin travması, alın nahiyəsinin kəsilmiş və sıyrılmış yarası, bud sümüyünün orta-alt üçdə birinin qapalı, qəlpəli, yerdəyişən sınığı, sol diz qapağının sınığı diaqnozları qoyulub və zəruri tibbi xidmətlər göstərilib.
Vəziyyəti ağır qiymətləndirilən 1956-cı il təvəllüdlü şəxs ilkin tibbi yardım göstərildikdən sonra Səhiyyə Nazirliyinin Elmi-Tədqiqat Travmatologiya və Ortopediya İnstitutuna, 1974-cü il təvəllüdlü şəxs isə Abşeron Rayon Mərkəzi Xəstəxanasına təxliyə olunub.
1995 və 1975-ci il təvəllüdlü şəxslərin müalicəsi Təcili tibbi yardım şöbəsində davam etdirilir. Onların vəziyyəti orta ağır qiymətləndirilir.
