Cəlilabad rayonunun Cəfərxanlı kəndi ərazisində yerləşən Paşatəpə qədim yaşayış məskənində aparılan arxeoloji qazıntılar zamanı mühüm elmi əhəmiyyətə malik yeni tapıntılar əldə olunub.
Cenublu.az xəbər verir ki, tədqiqatlar zamanı daha mükəmməl quruluşa malik dulus sobası aşkar edilib. Arxeoloqların qənaətinə görə, bu tapıntı Paşatəpənin qədim neolit dövrünə aid sənətkarlıq məhəlləsi olduğunu təsdiqləyir.
Qazıntılar zamanı, həmçinin daş əmək alətləri, əkinçilikdə istifadə olunduğu ehtimal edilən tam vəziyyətdə maral buynuzu və digər qiymətli arxeoloji nümunələr də üzə çıxarılıb.
Mütəxəssislərin sözlərinə görə, tapıntılar üzərində aparılacaq elmi araşdırmalar Paşatəpədə yaşamış insanların təsərrüfatı, məişəti və sənətkarlıq fəaliyyəti barədə daha dolğun məlumat əldə olunmasına imkan yaradacaq.
