Lənkəran-Astara Regional Təhsil İdarəsində (LARTİ) PISA 2025 – Beynəlxalq Şagird Qiymətləndirilməsi Tədqiqatında iştirak edəcək ümumi təhsil müəssisələrinin direktorları ilə görüş keçirilib.
Cenublu.az LARTİ-yə istinadən xəbər verir ki, görüşdə idarənin müdiri Bəhruz Mehdiyev bildirib ki, PISA – Beynəlxalq Şagird Qiymətləndirilməsi Tədqiqatında 2025-ci ildə Cəlilabad rayonu üzrə 7, Lənkəran rayonu üzrə 5, Masallı rayonu üzrə 4, Astara rayonu üzrə 3, Yardımlı rayonu üzrə 2, Lerik rayonu üzrə isə 1 təhsil müəssisəsi olmaqla, ümumilikdə region üzrə 22 məktəbin şagirdləri iştirak edəcəklər.
Görüşdə tədqiqat prosesində həyata keçiriləcək bütün addımlara yenidən nəzər salınıb və prosesin təşkili ilə bağlı müzakirələr aparılıb.
Qeyd edək ki, PISA ümumi təhsil müəssisələri üzrə 15 yaşlı şagirdlərin oxu, riyaziyyat, təbiət elmləri və yaradıcı düşünmə üzrə bilik və bacarıqlarını qiymətləndirmək, eyni zamanda, onları real həyatda tətbiq etmək qabiliyyətlərini müəyyənləşdirmək məqsədilə həyata keçirilən tədqiqatdır. Ölkəmizdə tədqiqat Təhsil İnstitutu tərəfindən həyata keçiriləcək. Tədqiqatda ölkə üzrə 8 minə yaxın şagird iştirak edəcək.
