Bu il Lənkəranda ötən ildəkindən 30 hektar çox, yəni 832 hektar sahədə çəltik əkilib. Bu haqda məlumatı Cenublu.az bu gün, 12 oktyabr tarixində Azertac-a istinadən verir.
Belə ki, Viravul kəndində 100 hektardan çox çəltik sahəsi olan təsərrüfatda biçin aparılır. Havaların qeyri-sabit keçməsi prosesi 15-20 gün gecikdirib. Təsərrüfatda “Apola” sortu, eləcə də ilk dəfə olaraq Türkiyədən gətirilmiş “Keşan” çəltik sortu əkilib. Məhsuldarlığı orta hesabla 7-9 ton olan bu sortların düyüsü qiymət baxımından da sərfəlidir, 2 manat - 2 manat 50 qəpiyə satılır. Mütəxəssislər yağıntılardan maksimum sığortalanmaq üçün bölgənin iqliminə uyğun çəltik sortları əkməyi məqsədəuyğun hesab edirlər.
Mütəxəssislər deyirlər ki, bölgədə əkilən çəltiklərin vegetasiya müddəti qısa olmalı, payız yağışlarına düşməməlidir. Bu baxımdan hər bir yeni toxumun vegetasiya dövrü öyrənilməli, əlverişli olmayan sortların kütləvi əkini aparılmamalıdır.
Lənkəran dayaq məntəqəsinin müdiri Teyyub Rzayev bildirib ki, bu il may ayı soyuq keçib, ona görə əkin gecikib. Bunun da nəticəsində biçin yağışlı aylara düşüb.
Qeyd edək ki, ötən il Lənkəranda əkilmiş 800 hektarlıq çəltik sahələrindən 2828 ton məhsul götürülüb.
