Bu gün Dövlət Sərhəd Xidmətinin Sərhəd Qoşunlarının baş leytenantı olan hərbi pilot Xalid Həsən oğlu Gözəlovun doğum günüdür.
Xalid Gözəlov 1996-cı ildə noyabrın 4-ü Biləsuvar rayonunun Aşağı Cürəli kəndində dünyaya göz açıb. 2012–2016-cı illərdə Milli Təhlükəsizlik Nazirliyinin Heydər Əliyev adına Akademiyasında ali təhsil alıb. Akademiyanı bitirdikdən sonra 2016-cı ildə Sərhəd Qoşunlarının sıralarında "leytenant" rütbəsi və pilot vəzifəsi ilə xidmətə başlayıb və 3 il sonra "baş leytenant" rütbəsinə yüksəlib.
Xalid Gözəlov Vətən müharibəsi zamanı Füzuli istiqamətində gedən döyüşlərə qatılıb. Sentyabrın 27-də döyüş tapşırığının yerinə yetirilməsi zamanı mayor, hərbi pilot Abbas Qasımov ilə birgə qəhrəmancasına şəhid olub.
Ölümündən sonra "Vətən uğrunda", "Qubadlının azad olunmasına görə" medalları və 3-cü dərəcəli "Vətənə xidmətə görə" ordeni ilə təltif edilib.
