Bu gün Azərbaycan Respublikasının Silahlı Qüvvələrinin Xüsusi Təyinatlı zabiti, baş leytenant Əliqismət Yaqublu Mükafat oğlunun anım günüdür.
Əliqismət Yaqublu 1992-ci ildə aprelin 18-də Lerik rayonunun Kələxan kəndində anadan olub. Evli idi. İki azyaşlı Əliəsgər və Məhəmməd adlı övladları var.
Təlim Tədris Mərkəzində hərbi biliklərini inkişaf etdirən Əliqismət Yaqublu 2015-ci ildə leytenant rütbəsi ilə Qobustanda yerləşən "N" saylı hərbi hissəyə təyinat alıb, amma elə həmin ildə komandanlığa ərizə yazaraq ön cəbhədə xidmət etmək istədiyini bildirib. 2016-cı ildə "Aprel döyüşləri"ndə xüsusi qəhrəmanlıq göstərən Əliqismət Yaqublu daha sonra Qobustana təyinat alıb. 2017-ci ildə yenidən öz istəyi ilə cəbhə bölgəsinə, Ağcabədiyə göndərilib. 2018-ci ildən baş leytenanta Xüsusi Təyinatlı Qüvvələrin Kimya Xidmət rəisi kimi mühüm vəzifə tapşırılıb.
Vətən müharibəsi zamanı Ə.Yaqublu Xüsusi Təyinatlı Qüvvələrin zabiti kimi ön cəbhəyə göndərilib. O, Murovdağ yüksəkliyi, Füzuli, Cəbrayıl, Zəngilan, Qubadlı rayonunun və Laçının bir neçə kəndlərinin işğaldan azad olunmasında xüsusi qəhrəmanlıq göstərib. Şuşanın azadlığı uğrunda gedən döyüşlərdə düşmənin xeyli sayda canlı qüvvəsini məhv edərək sıradan çıxarıb.
Baş leytenant noyabrın 5-də Şuşa uğrunda gedən döyüşlərdə, Daşaltı kəndində qəhrəmancasına şəhid olub.
Ə.Yaqublu ölümündən sonra "Azərbaycan Bayrağı" ordeni, "Vətən uğrunda", “Kəlbəcərin azad olunmasına görə”, “Xocavəndin azad olunmasına görə”, “Şücaətə görə” və "Şuşanın azad olunmasına görə" medalları ilə təltif edilib.
