Gəlin daşları Astara rayonunun Toradi kəndindən 4 km. aralıda yerləşir. Bu qayalar, həmçinin “Gəlin qayaları” da adlandırılır. Qayalar qərb-şərq istiqamətində, 200 metr uzunluqdakı ərazidə sıralanır.
Yerli sakinlərin dediklərinə görə, bu daşlar haqqında bir əfsanə mövcuddur. Əfsanəyə görə, bu kənddə bir toy mərasimi keçirilirmiş. Keçmiş zamanlarda olan adətə uyğun olaraq, gəlingətirmə mərasimi olduğu zaman bir kənddən digər kəndə gəlin aparırmışlar. Bu zaman onların qarşısına bir əjdaha çıxır. Həmin zaman insanlar çox qorxduqlarından Allahdan əjdahanın yerinə özlərini daşa döndərmələrini istəyirlər. Yaradan isə həm insanları, həm də əjdahanı daşa çevirir.
Qayalardan biri əjdahanın başına oxşadığı üçün onun adını daşıyır. Burada, həmçinin “at üstündə gəlin”, “güzgü aparan uşaq”, “belində uşağı olan qadın” və s. formalı daşları görmək mümkündür.
