Astarada fəaliyyət göstərən marketdə aparılan yoxlama zamanı ciddi nöqsanlar aşkarlanıb.
Cenublu.az xəbər verir ki, Qida Təhlükəsizliyi Agentliyinin əməkdaşları Astara şəhəri, İ.Kaverin küçəsində yerləşən, Həsənov Nurid Həsən oğluna məxsus "Olimp" marketdə yoxlama keçirib.
Baxış zamanı normativ hüquqi aktların tələblərinin pozulduğu müəyyən edilib. Belə ki, marketdə məhsulların saxlama şəraitinə və temperatur rejiminə əməl olunmadığı, mal qonşuluğu prinsipinin pozulduğu, eləcə də yararlılıq müddəti bitmiş məhsulların satışa çıxarıldığı aşkarlanıb.
Yoxlama zamanı həmçinin "Organic Brand", "Naturel", "Bakineç" və "Wheat Water" əmtəə nişanlı alkoqollu içkilərin etiket məlumatlarının saxtalaşdırıldığı və bu məhsulların qeydiyyatdan keçməmiş qida obyektində istehsal olunduğu müəyyən edilib.
Faktla bağlı inzibati protokol tərtib olunub, məhsullardan nümunələr götürülərək laborator müayinələrə cəlb edilib. Araşdırmalar davam etdirilir.
