Azərbaycan Qida Təhlükəsizliyi Agentliyinin (AQTA) əməkdaşları Lənkəran rayonunun Kənarmeşə kəndində yerləşən “Yeddi Bulaq” restoranında monitorinq keçiriblər.
Cenublu.az AQTA-ya istinadən xəbər verir ki, yoxlama zamanı obyektin sanitar-gigiyenik tələblərə cavab vermədiyi, işçi heyətin tibbi müayinədən keçmədiyi, müvafiq təmizlik işlərinin aparılmadığı, pəncərələrin qoruyucu tor örtüklə təmin edilmədiyi, qida məhsulları ilə təmasda olan səthlərin yuyula bilən, korroziyaya davamlı materialla üzlənmədiyi, mexaniki havalandırma sisteminin mövcud olmadığı və digər nöqsanlar müəyyən edilib. Həmçinin baytarlıq arayışı olmayan toyuq məhsulları, istifadə müddəti bitmiş göbələk sousu və şirinləşdirilmiş içkilər aşkarlanıb.
Faktla bağlı qanunvericiliyə uyğun olaraq sahibkar Elnurə Həsənova barəsində inzibati protokol tərtib edilib. Restoranın fəaliyyəti məhdudlaşdırılıb.
