Sabirabad sakini Firudin Şəmiyev ünvanına 100 manat məbləğində cərimə və 4 balın tətbiqinin əsassız olduğunu iddia edir. Sürücü iddia edir ki, qayda pozuntusunun qeydə alındığı ərazidə yol nişanlanması qırıq xətlə olduğundan, onun etdiyi hərəkət cərimələnməyə əsas vermir.
Xezerxeber.az-ın məlumatına görə, şikayətçi bildirib ki, hadisə paytaxtın Qaradağ rayonu, Müşfiqabad qəsəbəsindəki yol polisi postunun yaxınlığında, sement zavodunun qarşısındakı ərazidə baş verib. O iddia edir ki, nəqliyyat vasitəsilə yanacaqdoldurma məntəqəsindən çıxaraq qırıq xətt olan hissədə dönüb. Lakin buna baxmayaraq cərimə tətbiq olunub.
Firudin Şəmiyev məsələ ilə bağlı həmin əraziyə yenidən gedərək yolun vəziyyətini mobil telefonla qeydə aldığını və aidiyyəti qurumlara təqdim etdiyini deyir. Vətəndaş tətbiq edilən cəriməyə yenidən baxılmasını və problemin araşdırılmasını istəyir.
Baş Dövlət Yol Polisi İdarəsindən bildirildi ki, Firudin Şəmşiyevin ünvanladığı müraciət araşdırılıb. Müəyyən edilib ki, sürücünün yol hərəkəti qaydalarını pozması xüsusi texniki vasitə ilə qeydə alınıb və onun barəsində qanunvericiliyin tələbinə uyğun olaraq elektron protokol tərtib edilib. Aparılan əlavə araşdırmalar zamanı da sürücü barədə tətbiq olunan inzibati tədbirin tam əsaslı olduğu təsdiqini tapıb.
