Kərim Rəhim oğlu Axundov 1913-cü ildə Lənkəran şəhərində anadan olub. 1937-ci ilədək orada yaşayıb, şəhərin yol tikintisində iştirak edib. Bakıda Yol Texnikumunu bitirdikdən sonra dörd nəfər dostu ilə Rusiyada təhsillərini davam etdiriblər. Sonradan o, II Dünya müharibəsində Avropanın müxtəlif ölkələrində gedən döyüşlərdə iştirak edib. Böyük Vətən müharibəsi başladığı ilk gündən qələbəyədək ordu sıralarında bölük komandiri kimi faşist işğalçılarına qarşı vuruşub. O, Vyananın azad olunması əməliyyatında iştirak edib.
Ukrayna yaxınlığında gedən döyüşdə yaralanıb və onu sağaldan ailənin qızı ilə evlənib, iki oğlu olub. Həmin vaxtlarda o, Odessa şəhəri yaxınlığında aparılan tikintiyə rəhbərlik edib. Müharibə nəticəsində dağılmış təsərrüfatın, həmçinin Voznesenski rayonunun bərpasında fəal iştirak edib.
Sonradan onu Azərbaycana Bakı şəhəri yaxınlığında yeni salınacaq şəhəri inşa etməyə dəvət ediblər. Beləliklə, K.Axundov 1954-cü ildən taleyini Sumqayıtla bağlayıb. 1954-1960-cı illərdə bir sıra tikinti təşkilatlarında çalışaraq Zakpromstroy trestinə başçılıq edib.
O, müsahibələrinin birində deyib ki, Sumqayıta gələndə şəhər cəmi iki binadan ibarət olub: "1954-cü ildə məni Sumqayıta çağırdılar. Şəhərdə cəmi iki ikimərtəbəli bina var idi. 70-ci illərə kimi şəhəri tikdik. Mənim də vaxtım gəldi çatdı, daha işləyə bilmədim".
Sonrakı 13 ili Sumqayıt şəhər icraiyyə komitəsinin birinci müavini vəzifəsində işləyib. 1973-cü ildən 2 saylı tikinti trestində çalışıb. K.Axundov 15 il ərzində şəhər sovetinin deputatı olub. Onun əməyi dövlət tərəfindən yüksək qiymətləndirilib. O, iki dəfə “Qırmızı Əmək Bayrağı” ordeni ilə və bir sıra medallarla təltif edilib. K.Axundov Sumqayıtın Baş Planının işlənməsinə görə SSRİ-nin Nazirlər Sovetinin dövlət mükafatı laureatı olub. Ümumilikdə xidmətlərinə görə 30-a qədər medalla təltif olunub.
Prezident fərmanı ilə Sumqayıtın fəxri vətəndaşı və prezident təqaüdçüsü olub.
Kərim Axundov 2 fevral 2013-cü ildə 99 yaşında Sumqayıtda vəfat edib. Sumqayıt qəbiristanlığında dəfn olunub.
[caption id="attachment_35526" align="alignnone" width="336"]
Foto Cenublu.az[/caption]
