Lerik rayonunda hərbi xidmətini başa vurduqdan sonra anadangəlmə ürək qüsuru səbəbindən hərbi xidmətə yararsız olduğu müəyyən edilən şəxs 200 min manat maddi və mənəvi təzminat tələb edir.
2022-ci ildə Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) Lerik rayon şöbəsi tərəfindən hərbi xidmətə çağırılan şəxs əsgərliyini başa vurduqdan sonra müddətdən artıq həqiqi hərbi xidmət hərbi qulluqçusu (MAXE) olmaq istəyib. Lakin tibbi müayinə zamanı onda anadangəlmə ürək qüsuru – aorta qapağının bikuspid olması aşkarlanıb. Müdafiə Nazirliyinin hərbi həkim komissiyası onun hərbi xidmətə yararsız olduğunu və ümumiyyətlə, xidmətə çağırılmamalı olduğunu bildirib.
Bundan sonra vətəndaş SHXÇDX-nin Lerik rayon şöbəsinin və onun nəzdindəki hərbi həkim komissiyasının vəzifəli şəxslərindən şikayət edərək Baş Prokurorluğa müraciət edib. Araşdırma nəticəsində cinayət işinin başlanmasının rədd edilməsi barədə qərar qəbul olunub.
Qərarla razılaşmayan şəxs məhkəməyə üz tutub. İş Şirvan Apellyasiya Məhkəməsinə qədər gedib. Xanoğlan Bəhmənovun sədrliyi ilə keçirilən prosesdə şikayət təmin edilib və cinayət işinin başlanmasının rədd edilməsi barədə qərar ləğv olunub. İş yenidən araşdırılacaq.
Qeyd edək ki, vətəndaş hərbi xidmət zamanı antiterror əməliyyatlarında da iştirak edib. O, Müdafiə Nazirliyinin Baş Klinik Hospitalında hərbi xidmətə yararsız hesab edildikdən sonra bir neçə özəl klinikada da müayinədən keçib və eyni nəticə təsdiqlənib.
Mənbə: xitab24.аz
