Lənkəran Ağır Cinayətlər Məhkəməsində dostunu bıçaqlamaqda təqsirləndirilən Şamxal Cəbiyevin cinayət işi üzrə hökm oxunub.
Hadisə İmişli şəhərində baş verib. İttihama görə, Şamxal dostu və qonşusu Şəhriyar Əmirovla əvvəlcə kafedə, daha sonra çay evində yemək yeyib, spirtli içki qəbul edib.
Onların ortaq tanışı Şəhriyarı çay evindən çağırıb. O, qayıdacağını desə də, geri dönməyib və zənglərə cavab verməyib. Buna əsəbiləşən Şamxal telefonla dostunu təhqir edib.
Gecə saatlarında küçədə qarşılaşan dostlar arasında mübahisə yaranıb. Şəhriyarın onu itələməsindən sonra Şamxal cib bıçağı ilə onun qarın nahiyəsinə, sol əlinə və qoltuqaltı nahiyəsinə üç zərbə endirib.
Nəticədə Şəhriyarın qarın və döş qəfəsi nahiyələrində həyat üçün təhlükəli ağır xəsarətlər, sol əlində isə yüngül xəsarət yaranıb. Şamxala şəxsi münasibətlər zəminində qəsdən sağlamlığa ağır zərər vurma ittihamı irəli sürülüb. Məhkəmədə ona şərti cəza verilib və o, məhkəmə zalından azadlığa buraxılıb.
Qeyd edək ki, soyadlar şərtidir.
Mənbə: pravda.аz
