Şirvan Apellyasiya Məhkəməsində qəsdən adam öldürməyə cəhddə təqsirləndirilən Bağır Məlikovun barəsindəki hökmdən verilən apellyasiya şikayəti üzrə məhkəmə iclası başa çatıb.
İttihama görə, hadisə 2025-ci ildə İmişlidə baş verib. Həmin gün Bağır Məlikovla Kamal İmanov arasında Cəfərli kəndindən keçən şirin su kanalında elektrik cərəyanı ilə balıq tutulması üstündə mübahisə yaranıb. Kamal İmanov Bağırın bu üsulla balıq tutmasına etiraz edib.
Tərəflər axşam ərzaq mağazasında yenidən qarşılaşıb və mübahisə davaya çevrilib. Bağır Məlikov balıq tutmaq üçün istifadə olunan alətin sapı ilə tanışına zərbələr endirib. Daha sonra qisas almaq məqsədilə atasına məxsus "VAZ-21074" markalı avtomobili yüksək sürətlə onun üzərinə sürərək vurub.
Nəticədə Kamal İmanov ağır kəllə-beyin travması alıb. Ətrafdakı şəxslərin onu vaxtında xəstəxanaya çatdırması və həkimlərin müdaxiləsi nəticəsində həyatını xilas etmək mümkün olub.
Lənkəran Ağır Cinayətlər Məhkəməsi Bağır Məlikovu qəsdən adam öldürməyə cəhddə təqsirli bilərək 7 il 10 ay 15 gün azadlıqdan məhrum edib. Apellyasiya instansiyası da bu qərarı dəyişməyib.
Qeyd edək ki, ad və soyadlar şərtidir.
Mənbə: pravda.аz
