Azərbaycanda aztəminatlı ailələrin sosial müdafiəsinin gücləndirilməsi məqsədilə dövlət tərəfindən ünvanlı sosial yardım proqramı həyata keçirilir. Bu yardım ailənin gəliri ilə ehtiyac meyarı arasındakı fərq əsasında hesablanır və bir il müddətinə təyin olunur.
Modern.az-ın Dövlət Statistika Komitəsinə istinadən verdiyi məlumata görə, 2025-ci ilin əvvəlində ölkədə 334 mindən çox vətəndaş ünvanlı dövlət sosial yardımı alıb. Bir nəfərə düşən orta aylıq yardım məbləği isə 107.52 manat təşkil edib.
Sosial yardım alanların sayına görə ölkə üzrə lider Lənkəran-Astara iqtisadi rayonu olub. Bu bölgədə ümumilikdə 55 651 nəfər ünvanlı sosial yardımdan faydalanır.
Bölgə üzrə ayrı-ayrı rayonlara baxıldıqda isə Lənkəran və Masallı rayonları sosial yardım alanların sayına görə öndə gedir – hər iki rayonda 12 min nəfərdən çox insan bu yardımı alır.
Bakı şəhərində sosial yardım alanların sayı 43 559 nəfər, digər regionlar üzrə isə Gəncə-Daşkəsən (30 817 nəfər), Mərkəzi Aran (31 141 nəfər) və Qazax-Tovuz (29 441 nəfər) regionları ön sıralarda qərarlaşıb.
