"Qarabağ"ın sabiq futbolçusu olan Toral Bayramovun hazırda formasını geyindiyi "Bursaspor" Türkiyə 1-ci Liqasında azarkeş dəstəyi ilə diqqət çəkən göstəriciyə imza atıb.
Belə ki, TFF 1-ci Liqanın 2-ci turunda "Bursaspor" doğma meydanda "Iğdır"la qarşılaşıb. Bursa təmsilçisinin ev oyununda tribunaları 40 850 azarkeş doldurub.
Bu göstərici eyni turda keçirilən digər doqquz matçın ümumi tamaşaçı sayından çoxdur. Belə ki, həmin qarşılaşmaları ümumilikdə 30 711 azarkeş izləyib.
Turun 10 oyununda tribunaya gələn azarkeşlərin ümumi sayı 71 561 olub. Onların 57 faizini təkbaşına "Bursaspor" azarkeşləri təşkil edib.
"Bursaspor" - "Iğdı" matçında tribunaların dolması Türkiyə futbolunda da geniş marağa səbəb olub. Bursa klubunun azarkeşlərinin sayı digər doqquz qarşılaşmanın ümumi tamaşaçı sayını təxminən 33 faiz üstələyib.
Qeyd edək ki, Azərbaycan millisinin müdafiəçisi Toral Bayramov yeni mövsümdən "Bursaspor"da çıxış edir. O, Türkiyə klubunun heyətində mütəmadi oyun şansı qazanır. "Bursaspor" - "Iğdır" oyunu ev sahiblərinin 1:0 hesablı qələbəsi ilə yekunlaşıb.
Mənbə: idman.biz
