Masallıdan olan idmançı Rəşid Rəşidli növbəti möhtəşəm uğura imza atıb.
Cenublu.az xəbər verir ki, idmançı Türkiyənin İstanbul şəhərində keçirilən Dünya Döyüş Növləri üzrə İMAO dünya çempionatının final mərhələsinə yüksəlməyi bacarıb. Həlledici görüşdə rəqibini ikinci raundda texniki nokauta salan Rəşid döyüşdən qalib ayrılaraq dünya çempionu adına sahib olub.
Qeyd edək ki, Rəşidli Rəşid Rəssam oğlu 1993-cü ildə Masallı rayonunun Boradigah qəsəbəsində anadan olub. 6 yaşından “Karate-Do” idman növü ilə məşğul olan fəxrimiz ilk uğurunu Bakıda qazanıb.
2008-ci ildən kikboksinq idman növü ilə məşğul olan Rəşid Respublika çempionatında və Bakı birinciliyində uğurlu nəticələr əldə edib. 2011-ci ildə Gürcüstan Respublikasında kikboksinq üzrə keçirilən Beynəlxalq turnirin qalibi olub. 2012-ci ildə Türkiyədə keçirilən Dünya çempionatının, 2014-cü ildə ildə Gürcüstanda “K-1” versiyası üzrə,, 2014-cü ildə Ukraynada “Muay-tay” versiyası üzrə keçirilən beynəlxalq turinirlərin qalibi olub. 2017-2018-ci illərdə ölkəmizdə keçirilən Dünya çempionatlarında çempion adını qazanıb. 2019-cu ildə Ümummilli Lider Heydər Əliyevin xatirəsinə həsr olunmuş “Budo” döyüşü üzrə keçirilən Beynəlxalq turnirin, 2021-ci ildə Azərbaycanda peşəkar liqa yarışının qalibi olub.
Uğurlarının sayı-hesabı olmayan Rəşid Rəşidli 2021-ci ildə Türkiyənin Antalya şəhərində Tay-Kinq Valotudo döyüş növü üzrə keçirilən Dünya çempionatında Dünya çempionu adını qazanıb.
O, hazırda AZAL Aviasiya Təhlükəsizlik Xidmətinin əməliyyat üzrə böyük inspektoru vəzifəsində çalışır. Ailəlidir iki övladı var.
