Masallıdan olan yunan-Roma güləşçimiz Arif Niftullayev qızıl medal qazanıb. Bu haqda məlumatı Cenublu.az bu gün, 21 iyun tarixində verir.
Belə ki, Tatarıstanın paytaxtı Kazan şəhərində keçirilən "BRICS Sports Games Kazan 2024" beynəlxalq multiidman oyunlarında o, 97 kq çəki üzrə birinci yeri tutub.
Qeyd edək ki, Niftullayev Arif Arif oğlu 21 aprel 1997-ci ildə Rusiya Federasiyasının Moskva şəhərində anadan olub. 2000-ci ildə, atası vəfat etdikdən sonra ailəsi ilə Bakı şəhərinə köçüb.
2008-ci ildən “Neftçi” idman klubunda məşqçi-müəllim Elnur Müzəffərovun rəhbərliyi ilə yunan-Roma güləşi üzrə məşqlərə başlayıb. İlk illərdə Bakı şəhər birinciliyinin, sonra isə Azərbaycan çempionatının qalibi olub. Müxtəlif vaxtlarda yeniyetmələr və gənclər arasında bu uğuru təkrarlayıb. Azərbaycan kubokunun sahibi, beynəlxalq turnirlərin qalibi olub.
2014-2016-cı illərdə yunan-Roma güləşi üzrə yeniyetmələrdən ibarət ölkə yığmasının tərkibində baş məşqçi Nurəddin Rəcəbovun rəhbərliyi ilə, sonra isə gənclərdən ibarət milli komandanın heyətində müxtəlif kateqoriyalı mötəbər yarışların mükafatlarını qazanıb.
2017-ci ildə böyüklərdən ibarət respublika yığma komandasına cəlb edilib. Dəfələrlə ölkə çempionu olub, Türkiyədə, İranda, Serbiyada, Gürcüstanda, MDB ölkələrində və digər yerlərdə keçirilən beynəlxalq turnirlərdə uğurlu nəticələr göstərib.
2019-cu ildə Moskva Humanitar-İqtisad Universitetini bitirib. 2019-cu ildən idman ustasıdır.
2022-ci il 10-18 sentyabr tarixlərində Serbiyanın paytaxtı Belqrad şəhərində təşkil olunan yunan-Roma güləşi üzrə dünya çempionatında 97 kiloqram çəki dərəcəsində bürünc medala sahib olub.
Bu yarışda 9 idmançı ilə təmsil olunan yığmamız yekunda 118 xalla (5 medal) komanda hesabında ikinci yeri tutub.
