Beynəlxalq Gənclər Gününə həsr olunmuş gənc qızlar və oğlanlar arasında voleybol üzrə Lənkəran rayon açıq turniri başa çatıb. Bu haqda məlumatı Cenublu.az bu gün, 17 avqust tarixində verir.
Lənkəran rayon açıq turnirinin final mərhələsi Lənkəran Olimpiya İdman Kompleksində baş tutub. Yarış Azərbaycan Voleybol Federasiyası ilə Lənkəran-Astara Regional Gənclər və İdman İdarəsinin birgə təşkilatçılığı ilə həyata keçirilib.
İdman yarışının qaliblərinin mükafatlandırılma mərasimində Azərbaycan Voleybol Federasiyanın prezidenti Şahin Bağırov, Lənkəran ŞİH-nin başçısı Taleh Qaraşov və Lənkəran-Astara Regional Gənclər və İdman İdarəsinin rəisi Teymur Babazadə iştirak ediblər.
Çıxışlarında Azərbaycanın beynəlxalq aləmdə idman ölkəsi kimi tanındığını vurğulayan hər iki natiq, dövlətimiz tərəfindən idmançılarımıza göstərilən yüksək diqqət və qayğıdan danışıblar. Bildirilib ki, ölkədə idmanın inkişafı minlərlə yeniyetmə və gəncin sağlam ruhda tərbiyə edilməsi, onların əsl vətənpərvər kimi formalaşması işinə müsbət təsirini göstərib.
Tədbirin sonunda gənc qızlar və oğlanlardan ibarət, ümumilikdə 12 komandanın yarışdığı turnirdə qaliblər kubok, medal və diplomlarla mükafatlandırlıblar.
