Futbol üzrə Azərbaycan kubokunun 1/8 final mərhələsində Ağdamın “Qarabağ” və Bakının MOİK komandaları Xankəndi stadionunda qarşılaşıb.
Oyunun 90+5-ci dəqiqəsində “Qarabağ”ın hücumçusu, əslən Lənkərandan olan Nəriman Axundzadə hesabı açaraq tarixi qolun müəllifi olub.
“O qolun müəllifi olmaq şərəfdir. Şəhidlərimizə həsr edirəm”, – deyə o, müsahibəsində bildirib.
Qeyd edək ki, Nəriman Əhməd oğlu Axundzadə 23 aprel 2004-cü ildə anadan olub. "Qarabağ" klubuna 9 yaşında qoşulub. O, Azərbaycan çempionatının 2022-23 mövsümünün 12-ci turunda "Qarabağ"ın heyətində debüt edib. Həmin mövsüm futbolçu komandasının Azərbaycan Premyer Liqasındakı qələbəsində rol oynayıb. Nəriman 21 yaşadək futbolçulardan ibarət Azərbaycan milli komandasının heyətində çıxış edib.
O, 19 noyabr 2023-cü ildə UEFA Avro-2024-ün seçmə mərhələsində Belçikaya qarşı uduzduqları oyunda Azərbaycan millisinin heyətində debüt edib.
