Miki kəndi Astara şəhərindən təxminən 45 km aralıda, Talış dağlarında yerləşir.
Yerli sakinlərin dediklərinə görə, əvvəllər kəndin adı “Miyanküy” olub. Talış dilindən tərcümədə "miyan" orta və "küy" dağlar deməkdir, yəni "dağların ortasında kənd". Sonradan kəndin adı dəyişərək "Miki"yə çevrilib.
Kəndin adının yaranması haqda bir neçə versiya da var. Kəndin adının qədim Miki tayfasının adından götürüldüyü ehtimal edilir. Həmçinin kəndin adının XII əsrdə bu ərazilərdə gedən döyüşlərdə həlak olan və burada qəbiristanlıqda dəfn edilən Monkin adlı tatar sərkərdəsi ilə bağlı olduğu iddia edilir. Deyilənə görə, kəndin adı da "Monkinin öldüyü yer" kimi, sonralar Miki adlandırılıb.
Çoxsaylı qəbiristanlıqlar və pirlər kəndin qədim tarixi olduğunu sübut edir. Məsələn, bu kənddə “Miki dolmen nekropolu” (arxeoloji qazıntılar zamanı tapılan məzarlıqlara verilən addır) arxeoloji abidəsi yerləşir. Nekropolun yaranma tarixi e.ə. II minilliyin sonu-I minilliyin əvvəlinə aid edilir.
Miki kəndinin şimal hissəsində Monkəllə deyilən yer var. Deyilənlərə görə, burada monqollarla döyüşlər olub. Döyüşlərdə həlak olan monqollar məhz burada dəfn olunduqlarına görə, "monqol kəllələrinin basdırıldığı yer", yəni "Monkəllə" adlandırılıb.
Hazırda Miki kəndinin sakinləri arıçılıq, maldarlıq və sitrusçuluqla məşğul olurlar. Ümumilikdə Astara rayonunda 27-30 minə yaxın arı ailəsi var, onlardan təxminən 3 mini bu kənddə yerləşir. Deyilənə görə, buranın balı o qədər məşhur idi ki, Rusiya çarı I Pyotr da bu baldan ona gətirilməsini istəmişdi.
Kənd əhalisinin arı və bal ilə bağlı bir çox deyimləri var. Onlardan biri də budur:
“Arı peyğəmbərə deyib ki, icazə ver, mən qızıl gətirim, insanı sancım, o, ölsün. Peyğəmbər isə deyib ki, yox, sən bal gətir, adamı sanc və özün öl” .
