Məşhur türk müğənnisi, əsasən, Rafet El Romanla oxuduğu duetlərlə məşhurlaşan Ezo Genç əslən Lənkərandandır.
O, 29 yanvar 1991-ci ildə Lənkəranda anadan olub. Əsl adı Səadətdir. Anası dərzi, atası isə vəkildir. Dörd övladlı ailənin ikincisidir.
Uşaqlıqdan təsviri sənətə və musiqiyə maraq göstərdiyindən orta məktəbi bitirənə qədər Azərbaycan Dövlət Filarmoniyasının solisti olub. Rafet El Roman Bakıdakı konsertindən sonra təsadüfən Ezoya qulaq asıb, səsinə heyran olub və albom hazırlamaq üçün İstanbula dəvət edib. 2009-cu ildə Ezo İstanbula köçüb. Bu müddət ərzində o müğənnilik, diksiya və aktyorluq dərsləri alıb.
2013-cü ildə ulduzu Rafet El Romanla ifa etdiyi “Kalbine Sürgün” dueti ilə parlayıb. İlin dueti, ilin mahnısı, ilin ən yaxşı debüt sənətçisi bir çox mükafatlara layiq görülüb. 2014-cü ildə “Git Diyemem” adlı sinql ilə Ezo musiqisevərlərdən tam qiymətini alıb. O, ara vermədən albom üzərində işləməyə başlayıb və “Liman” mahnısı üçün klip çəkdirib. Albomda Zeki Güner, Aşkın Tuna, Destan Hakan, Ahmet Selçuk İlkan, Rafet El Roman və Gökhan Güneşin mahnıları da yer alıb. Albomun ən özəl mahnılarından biri Rəşid Behbudovun ifa etdiyi “Aylı Gecələr” mahnısı olub. Onun bu ifası həm türk, həm azərbaycanlı izləyicilər tərəfindən rəğbətlə qarşılanır.
Dəfələrlə reklam çarxlarına çəkilən Ezo Palma Group-a məxsus “Palsüt” və dondurma reklamlarında da rol alıb.
