Astaradan olan tədqiqatçı-alim, Qahirə Universitetinin Ədəbiyyat fakültəsinin Azərbaycan dili müəllimi, “Misir-Azərbaycan Dostluq Cəmiyyətinin” və Azərbaycanın Misirdə Diaspor Təşkilatları Birliyinin sədri, "Tərəqqi" medallı Seymur Nəsirov Şüvi kəndində anadan olub.
1998-ci ildə Bakı İslam Universitetini, 2002-ci ildə isə Əl-Əzhər Universitetinin İslamşünaslıq və Ərəb dili fakültəsini bitirib.
2006-cı ildə Misir Fətva İdarəsində dörd il təhsil aldıqdan sonra keçmiş SSRİ ölkələri arasında ilk dəfə fətva vermək icazəsini qazanıb.
2011-ci ildə Qahirədə Açıq Amerika Universitetində Ərəb dili və ədəbiyyatı ixtisası üzrə magistratura təhsilini, 2020-cil ildə isə dokturluq təhsilini fərqlənmə ilə başa vurub.
Azərbaycan Respublikasının Prezidenti İlham Əliyevin 2017-ci il 28 dekabr tarixli sərancamı ilə "Tərəqqi" medalı ilə təltif olunub.
Misirlə Azərbaycan arasında mədəni və elmi əlaqələrin inkişafında göstərdiyi müstəsna xidmətlərinə görə 2018-ci il 18 iyul tarixində "Misir Təhsil Nazirliyinin medalı" ilə təltif olunub;
2019-cü ildə Misirdə yaşayan Özbəkistan diasporuna verdiyi dəstəyə görə, Özbəkistanın Misirdəki səfirliyi tərəfindən mükafatlandırılıb.
2020-ci ildə ölkəmizin diaspor siyasətinə verdiyi böyük töhfələrə görə "Diaspor fəaliyyətində xidmətə görə" medalı ilə təltif olunub.
Həmçinin Seymur Nəsirov 2007-ci ildə "İrsi canlandırma və yerli inkişaf üzrə Halqa Fondunun təsisçilərindən biri və baş direktorudur. 2008-ci ildən "Qavafil əl-Xeyr və əl-Əməl" xeyriyyə cəmiyyətində xarici tələbələrin işi üzrə baş rəhbərdir. 2011-ci ildən Misir əl-Xeyr fondunun xarici tələbələrin işi üzrə baş rəhbəridir. 2017-ci ildən Qahirə Universitetinin Ədəbiyyat fakültəsində Azərbaycan dili müəllimidir.
Qeyd edək ki, ötən gün, noyabrın 12-də, Seymur Nəsirovun 48 yaşı tamam olub.
